نبؤة

على أبواب الإمام

درويش المقام
سيدنا الحسين
أنا بشتكي عِلَّة
بفتح ضلوعي بيخرجوا دراويش
ماسكين صاجات و بيرقصوا
و زي ما الدرويش يلف
بلف أنا زيُّه
سيدنا الحسين
أنا تحت جلدي
متربصينلي أوليا
حاكمين على روحي بغياب
وأنا جي ليك و أشتكي من
غربة الروح في البدن
واشتياق عمال يزيد
إني أضيع
و أطلق شعوري و لحيتي
و أسرح مع الدراويش
مريد
أمسك صاجات و ألف..
ألف.. ألف..
تنورتي تبقى دنيتي
و أنا دنيتي فانية
و الجنة ف جوارك
اللقمة من عندك
و الكسوة من عندك
و أنا كسوتي من صوف
مظلوم بجيلك و أشتكي
و بعود لدنيتي منصوف
أنا قلبي من كتر الذنوب يا إمام
بقى بين ضلوعي بيستحي
مكسوف
سيدنا الحسين
أنا برتجف و أسأل سؤال
إيه اللي فاضل فيا حي
السبحة مفروطة ف إيدايا
شايله الوجع بركات
تلاتين ريال فضة
و أنا سرتي فاضية
من الدنانير..
و محبتي مش زيف ...
قافلين بيبانك يا حسين
بترجى فيهم يفتحوا
و لا يفتحوش
ما بيرحموش
و الرحمة عندك يا حسين
ارحم مجاور
كان نفسه ينقش قبتك
تواشيح حياة...
و بعدها يفنى كده
جنب الضريح..
سيدنا الحسين
أنا بشتكي علة
ديماً بموت
ملقاش ضريح...

معزور

الضحكة اللي فايتها إمبارح

تتعمد تألم فِ ملامحك

و تسمحك لو طرحت عينك يوم دمعه

الليل بيحن عليك وبيسمح

رغم العتمه

بنور شمعه

اليأس اللي بيرسم شيبك

يتمنى ف يوم إنه يسيبك

وإنت بتتعمد توصله

الشمس بتضحك على ضلّك

وبتفرح قوي لمّا تغيب

وتجيب

رغم هموم الدنيا فوقيك

صهد ونار وتحت عليك

السكه الكانت حافظه تسمّع صوت خطويك

بتنكر إنك دوست عليها

الناس من ضهرك ترجم طهرك بذنوبك

وبتجحد اسمك ووجودك

بتشفّع عشرة عمرك ليهم

بيخونك عيشك والملح

يــــــــــاااااااااه

لساك فاكر إنك عايش

طب هتلي دليل

غلطان لو قلت دليلك

حبةأشواق أو حبة عشق

ضيعت سنينك تزرع فيهم

فى قلوب بور

معزور

لعدم كفاية الأدلَة

و سلالم المترو ستنكرُ أنها

قد أبصرتْ يوماً خطاك

وستبقى الغريب وحدك

وجميعهم شرفاءٌ صالحون

وسينعتونك بابنِ الفاعلة

فقط لعدم كفاية الأدلَة

السامري

كأسٌ من الدهشةْ

تَعِبْ

ََنخبُ انكسارْ

أنت اللذي قد أمطرك مطرُ الغيابْ

فسقطتَ وحدك فى المقهى ههنا

لا امرأةً و لا بيتاً ولا حتى ولد

هذا غيابُك فانطفئ

إنَها تمطر بشدة

إلحقوا إلحقوا يا جماعة

إطلعوا بسرعة للشارع

و بصوا ع السما

السما بتمطَر ملايكه

أوفرتير للجمهور

صفقوا ما شئتم للفراغ

نحن لسنا إلا وهمٌ أو سراب

لن نعرض اليوم شيء

مات المهرج وانتحر

لكنَه أوصى لنا بالبكاء

أبكوا ما شئتم للحياة

لن تخدعونا

- نحن من مات حباً فى الحياة-

صداقة

ما فائدة الأصدقاء إن لم يطعنوك

من الخلف

SMS

أبشع شىء

لما موبايلك ما يستلمشي غير رسائل

Please call me

در دشة

عمرك حسيت إنك بتتألم للأخرين وبس

لدرجة إنك مبقتشي تتألم لروحك

ويوم متقرر إنك تتخلّى عن ألام الآخرين وتنتبه لنفسك

تلقى كمية وجع كبيرة لنفسك مستنياك تتألمها لوحدك

أحدهم

مر من هنا ولم يشعر به أحد

غياب الحضور

مر من هنا و لم يشعر به أحد

بحث

و ما زال البحث عني مستمر

يقين

وفق حساباتٍ دقيقة أكد الخبراء أنك في الثامن والعشرين من شهر أكتوبر القادم ستكون حزيناً جداًّ

مصير

أعترض كثيراً مع الجاحظ ودخل في مشادةٍ حادة مع ابن رشد والفارابي

هجروه جميعاً وتركوه وحيداً يلمس الجدران الباردة بكفٍ ضريرة

في العباسية

جهل

عندما أخبرهم بما يجيد

أنكروه

لأنه يعيش بينهم

و جميعهم حمقى

مشهد من موتٍ واحد

دمي اللي سايل ع الجدار

بيسألني

إزاي أكون دمك وتسفحني

((ستار))