Wednesday, July 29, 2009

اليوم الضائع


قال تشارلي تشابلن : " يومُ بلا ابتسامه هو يومُ ضائع من عمري

شوف على كده كام يوم ضاع مننا

راموس

Saturday, August 9, 2008

حداد إلى ... حين


العظيم
محمود درويش
الذي تربينا بين يديه
الذي علمنا معنى الثورة والحب
مات

العين التي كنا نرى بها
جفت
اللسان الذي تبقى لنا
قطع
القلب الذي طالما نبض بالحياة ولها
توقف
روحنا نضبت

ارفعوا رايات الحداد
وابكوا أنفسكم

Sunday, April 6, 2008


الليلة برد

و إنت اللي وحدك ف المقام

سيدنا الحسين و الأوليا

خذلوك صحيح

مش لاقي لسؤالك جواب

الليلة برد

و إنت اللي راضي بجلستك

وسط الشيوخ و الشحاتين المجذوبين

و المبتلين بالعشق

بتداري خوفك بالتمسح ف الضريح

و إنت الذبيح

مش وصله روحك للسما

الليلة برد

و منين يجيلك الدفا

و البرد ساكن ف الضلوع

و البرد بيغطي المقام و الروح

أما البدن

بيحن ديماً للتراب

بتلم توبك تلتقي

تلاتي غلام مستنين

يتعلموا منك فصاحة

فتهم تمسك ف المقام

و بتبتهل

ما كانش ينفع تستمر ف كدبتك

مش منطقي أنك بتعد عنهم

و بيبتهل

كلام الناس و دسواس خناس

و بتبتهل

تورث أبوك حزناًو تورثه لغيرك

و بتبتهل

سيرتك وجع ف ودان عشيرة بتكرهك

و بتبتهل

و الصرخة منك تنتحر

قلبي خلاص مش حمل صبر

تسقط صريع التعب

و بتبتهل

و بتبتهل

و بتبتهل

و الليلة بررررررررد

Thursday, March 20, 2008

لا شيء يحميك انكسارك
أنت نهب للطريق
صدقت نبؤات الولي

Sunday, March 9, 2008

اطلال


السلام عليكم يا أهل النت لعل معظمكم يتساءل ما الذي أعادني مرة أخرى إلى المدونة بعد انقطاع دام أربعة أشهر

عند إذٍ اجيبه بـــــ : و إنت مالك

عموماً العودة ديه بتفكرني بكلام قيس

"و لقد أمر على الديار ديار راموس فأقبل ذا الجدار و ذا الجدار

Tuesday, October 2, 2007

Saturday, August 25, 2007

على أبواب الإمام





درويش المقام
سيدنا الحسين
أنا بشتكي عِلَّة
بفتح ضلوعي بيخرجوا دراويش
ماسكين صاجات و بيرقصوا
و زي ما الدرويش يلف
بلف أنا زيُّه
سيدنا الحسين
أنا تحت جلدي
متربصينلي أوليا
حاكمين على روحي بغياب
وأنا جي ليك و أشتكي من
غربة الروح في البدن
واشتياق عمال يزيد
إني أضيع
و أطلق شعوري و لحيتي
و أسرح مع الدراويش
مريد
أمسك صاجات و ألف..
ألف.. ألف..
تنورتي تبقى دنيتي
و أنا دنيتي فانية
و الجنة ف جوارك
اللقمة من عندك
و الكسوة من عندك
و أنا كسوتي من صوف
مظلوم بجيلك و أشتكي
و بعود لدنيتي منصوف
أنا قلبي من كتر الذنوب يا إمام
بقى بين ضلوعي بيستحي
مكسوف
سيدنا الحسين
أنا برتجف و أسأل سؤال
إيه اللي فاضل فيا حي
السبحة مفروطة ف إيدايا
شايله الوجع بركات
تلاتين ريال فضة
و أنا سرتي فاضية
من الدنانير..
و محبتي مش زيف ...
قافلين بيبانك يا حسين
بترجى فيهم يفتحوا
و لا يفتحوش
ما بيرحموش
و الرحمة عندك يا حسين
ارحم مجاور
كان نفسه ينقش قبتك
تواشيح حياة...
و بعدها يفنى كده
جنب الضريح..
سيدنا الحسين
أنا بشتكي علة
ديماً بموت
ملقاش ضريح...